Wasaaradda Warfaafinta dhaqanka iyo Dalxiiska Xukuumadda Federaalka ayaa sheegtay in ay dib usoo nooleeneyso Dalxiiska Soomaaliya, si dhaqaale uga soo galo Dowladda
Wasiiru dowlaha Warfaafinta, dhaqanka iyo dalxiiska ee Xukuumadda Soomaaliya Mudane Maxamuud Cabdi Beekos oo howlo shaqo ku jooga magaalada Nairobi ee xarunta dalka Kenya ayaa sheegay in Wasaaraddu ay xoogga saari doono sidii loo helo meelo loo dalxiis tego, maadaama amniga magaalada ay tahay mid la isku haleyn karo.
Wasiiru dowlaha waxa uu tilmaamay in Wasaaraddu ay howlgelin doonto hay’addii ku shaqada lahayd dhanka dalxiiska, si dowlada ay uga hesho lacag badan.
“Dalxiisku sida aad ogtihiin waa mid aan xuduud lahayn, dowlado waa weyn ayaa lacag ka abuura, Wasaaraddu waxay qorsheyneyaa inay howlgeliso dalxiiska, maadaama haatan la dhisay Hoteello badan, waxaan kaloo qorsheyneynaa in arrimaha dalxiiska ay noqdaan mid dhamaan ay dadku ka faa’iideystaan” ayuu yiri Mudane Maxamuud Cabdi Beekos.
Wasiiru-dowlaha Warfaafinta oo hadalkiisa siiwata ayaa xusay in magaalada Nairobi uu kula kulmay Wasiirka Dalxiisa ee Kenya Najiib Balala oo ay ka wada hadleen arrimo badan.
“Sidii aan u sameyn lahayn sharuucda duurjoogto iyo kuwa dalxiiska ayaan kala hadalnay Wasiirka Dalxiiska ee Kenya oo aan isku afgaranay in ay gacan nagu siiyaan sameynta sharciyadan oo aan horey dalka uga jirin, runtii meel fiican ayaan isla gaarnay” ayuu yiri Wasiiru-dowlaha Warfaafinta.
