Shirkan oo ay si wadajir ah usoo qaban qaabiyen Wasaaradda Beeraha Soomaaliya , Hey’adda horumarinta Warshadaha ee Qaramada Midoobay oo marka magacooda la soo gaabiyo loo yaqaan (UNIDO) iyo Hey’adda Deeq bixinta ee Talyaaniga ee (AICS), ayaa waxa uu daba socda bandhigga dalagyada Beeraha oo ka dhacay dalka Talyaaniga oo ay shirkado khudaarta ka shaqeeya iyo beeraleey Soomaaliyeed oo ay dirtay Wasaaradda Beeraha Soomaaliya, kusoo bandhigeen khudaarta noocyadeeda kala duwan, taas oo soo jiidatay Dalalkii ka qeyb galay bandhigga.
Wasiir ku xigeenka Wasaaradda Beeraha Soomaaliya, Wasiirka Beeraha Maamul Goboleedka Putland, Safiirka Soomaaliya ee dalka Talyaaniga, wakiilo ka socday hey’addaha UNIDO iyo AICS iyo shirkadaha iyo beeraleyda Soomaaliyeed ee ka qeyb galay bandhigga ayaa kulanka isku weedaarsaday faa’iidooyinkii laga dhaxlay bandhigga iyo sida ugu haboon ee lagu horumarin karo wax soo saarka dalka loona heli karo suuqyo caalamiya oo ay beeraleyda Soomaaliyeed ka faa’iideystaan.
Wasiir ku xigeenka Wasaaradda Beeraha Soomaaliya Mudane Xaamud Cali Xasan ayaa sheegay in shirkan uu muhiimad gaar ah u leeyahay horumarinta Wax soo saarka beeraha dalka.
Wasiirka Deegaanka iyo Beeraha Putland Ismaaciil Diiriye Gamaadiid oo qeyb ka ahaa mas’uuliyiintii ka qeyb galay bandhigga ayaa bidhaamiyey in aad loogu helay wixii ay Soomaaliya halkaasi kusoo bandhigtay, isagoo beeraleyda Soomaaliyeed ugu baaqay inay sare u qaadaan wax soo saarka dalagyada kala duwan ee beeraha, kana faa’iideystaan fursadaha maalgeshiga ah.
Qaar kamida shirkadaha iyo Beeraleyda Soomaaliyeed ee ka qeyb galay bandhigga ayaa si wada jir ah u qiray in tani ay u tahay tallaabo dhiiri gelin ah, iyagoo u mahadceliyay Wasaaradda Beeraha Soomaaliya.
