Wasiirka Xanaanada, Xoolaha, Dhirta iyo Daaqa Soomaaliya mudane Xuseen Maxamuud Sheekh Xuseen, Ganacsato iyo bulshada qeybaheeda kala duwan ayaa ka qeyb galay xuska Maalinta badqabka cuntada adduunka oo maanta oo kale laga xuso dunida oo dhan.
Ogaanshaha iyo Maaraynta halista cuntada ka dhalata, Ilaalinta halbeegyada caalamiga ah ee badqabka cuntada iyo qaabkii looga wada shaqeyn lahaa sidii ay Dadka Soomaaliyeed ku heli lahaayeyn cunto badqabta oo la isku haleyn karo ayaa inta badan looga hadlay munaasabadan oo ay soo qaban qaabisay Wasaaradda Xanaannada, Xoolaha Soomaaliya oo kaashaneya hay’adaha FAO iyo WHO.
Wasiirka Xanaanada, Xoolaha, Dhirta iyo Daaqa Soomaaliya mudane Xuseen Maxamuud Sheekh Xuseen oo munaasabadda furay ayaa sheegay inay muhiim tahay in si wadjira looga wada shaqeeyo ilaalinta badqabka cuntada.
Mudane Xuseen Maxamuud Sheekh Xuseen Wasiirka Xanaanada, Xoolaha, Dhirta iyo Daaqa Soomaaliya ayaa dhinaca kale sheegay inay Xukuumadda Soomaaliya ka go’antahay sidii ay dadka Soomaaliyeed u heli lahaayeen cunto badqabta, xilli maanta dunida oo dhan laga xusay Maalinta badqabka cuntada adduunka.
Ugu dambeyn Wasiirka Xanaanada, Xoolaha, Dhirta iyo Daaqa Soomaaliya ayaa indho indheeyay madal ay qaar ka mida ganacsatada munaasabadda ka soo qeyb gashay ku soo bandhigeen qeybo ka mida cunada oo badqabkooda aad looga shaqeeyay, wuxuuna ku dhiiragaliyay inay laba jibaaraan shaqada wanaagsan oo ay bulshada u hayaan, isagoo u balan qaaday in Wasaaraddu ay ka shaqeyn doonto sidii ay ganacsatada u heli lahaaueen maalgelin caalami ah.
