Wasiir ku-xigeenka Wasaaradda Warfaafinta, Dhaqanka iyo Dalxiiska ee Xukuumadda Federaalka Soomaaliya Mudane Cabdiraxmaan Yuusuf Sheekh Al-Cadaala oo ka qeyb galay barnaamij toos ah oo ka baxay Warbaahinta Qaranka ayaa ummadda Soomalaiyeed ugu hambalyeeyey xoreynta Xarardheere iyo deegaanadii kale ee maanta laga saaray Khawaarijta.
Wasiir Al-Cadaala ayaa xusay in Dowladda Soomaaliyeed ay guul weyn uga dhigantahay in Degmooyin iyo deegaanno horleh oo Galmudug ka tirsan laga ciribtiro khawaarijta, isagoo xusay in magaalada Xarardheere iyo deegaannada kale ee gacanta dowladda soo gashay ay ahaayeen dardaarankii Madaxweynaha Dalka markii uu tegay Galmudug, lana sii wadi doono howlgallada ka dhanka ah Khawaarijta.
Related posts
“Magaalada Xarardheere waa mid ka mid ah magaalooyinka ugu faca weyn Gobolka Mudug, waana mid ka mid ah magaalooyinkii ugu horeeyey ee degmo noqdo Soomaaliya, waa magaalo dad kala duwan oo xadaari ah ay deganyihiin, sidaas oo ay tahay Khawaarijta fariisin muhiim ah ayay u ahayd”. Ayuu yiri Wasiir Al-Cadaala oo hadalkiisa ku daray ” Magaalada Xarardheere waxa ay khawaarijta ku tababari jireen carruurta ay xoog ku soo kaxeystaan, waxa ay magaalada ka soo dajin jireen argagixisada Ajaanibta ah iyo waxa ay ka soo degsan jireen hubka iyo qaraxyada, Alle ayaana ku mahadsan in maanta magaalada ay ku jirto gacanta Dowladda”.
Wasiir ku-xigeenka Warfaafinta ayaa hoostaga ka xariiqay in magaalooyinka laga xoreeyay khawaarijta laga hirgelin doono dhammaan adeegyada aas aasiga u ah nolosha Beni-aadamka.
