Muqdishu Somalia – Wasaaradda Warfaafinta, Dhaqanka iyo Dalxiiska ee Jamhuuriyada Federaalka Soomaaliya, waxa ay qabaneysaa maalinka Isniinta ah 7 September 2015, bandhig dhaqanka iyo fanka ah, kaas oo lagu soo bandhigi doono waxqabadka Wasaaradda ee ololaha soo nooleyta dhaqanka iyo fanka Soomaaliyeed, kaas oo Wasaaraddu ay muddo afar bilood ah ka wadday koofurta iyo bartamaha dalka, gaar ahaan gobolada Banaadir, Shabeelada Dhexe iyo Shabeelada Hoose.
Bandhigan ayaa lagu soo gudbin doonaa waxqabadka Wasaaradda Warfaafinta, Dhaqanka iyo Dalxiiska ee soo nooleynta dhaqanka iyo fanka Soomaaliyeed, ayada oo lagu soo bandhigi doono dhallinyaro loo tababaray fanka, farshaxanka, sawir-gacmeedka, cayaaraha iyo heesaha.
“Wasaaradda Warfaafinta,Dhaqanka iyo Dalxiisku , waxay muddadii la soo dhaafay aad isugu howshay soo nooleynta iyo xoojinta dhaqankii dhaawucu gaaray, taas oo loo maray bandhigyo kala duwan oo dhaqanka la xiriira, oo lagu qabtay degmooyinka gobolka Banaadir iyo gobollada dalka qaarkood” ayuu yiri Wasiir ku xigeenka Wasaaradda Warfaafinta, Dhaqanka iyo Dalxiiska Mudane Cabdullaahi Colaad Rooble.
Ujeedada Bandhigan laga leeyahay ayaa ah in la muujiyo sida Wasaaradda Warfaafinta, Dhaqanka iyo Dalxiiska ay xoogga usaareyso wacyigalinta bulshada Soomaaliyeed, sare u qaadista fanka iyo dhaqanka Soomaaliyeed, tababaridda dhallinyarada ee dhinaca fanka iyo dhaqanka iyo in fursado loo abuuro dhallinyarada si ay ugu helaan fursad waxyaabaha ay ku haminayaan in ay noqdaan mustaqbalka.
Waa barnaamij lagu horumarinayo adeegyada bulshada ee dowladda iyo xoojinta dowladnimada Soomaaliyeed, taas oo lagu gaarayo hirgelinta barnaamijyo dadka ay ayagu arki karaan wax qabadka dowladda gaar ahaan kan Wasaaradda Warfaafinta, Dhaqanka iyo Dalxiiska ee ku aaddan soo nooleynta dhaqanka iyo fanka Soomaaliyeed.
