Wasiiru Dowlaha Wasaaradda Arimaha Gudaha iyo Federaalka ahna ku-simaha Wasiirka Mudane Cabdirashiid Maxamed Xidig ayaa maanata xafiiskiisa kulan kula qaatay Mas’uuliyiin ka socday ku dhawaad 60-Hay’adood oo ka shaqeeya arrimaha samafalka, waxaana uu kala hadlay sida dadka Somaaliyeed looga badbaadin karo abaaro iyo fatahaado la saadaaliyay in 3-da bil ee soo socota ay ka dhici karaan Qaar kamid ah Gobolada Dalka.
Kulanka oo mudo djhowr saacadood ah socday ayaa la isku dhaafsaday qaabka ugu haboon ee dadka wacyigelin loogu sameyn karo si noloshooda loo badbaadiyo, iyadoo Hay’dihii kulanka ka qeybgalayna ay balanqaadeen inay caawin doonaan dadka laga cabsi qabo inay saameeyaan abaaraha iyo fatahaadaha.
Guddoomiyaha Hay’ada Maareynta Musiibooyinka Qaranka Mudane Cabdullahi Jimcaale oo Warbaahinta Qaranka Wareysi siiyay ayaa sheegay in iyagoo kaashanaya Hay’adaha Samafalka ay wadaan dadaalo looga hortagayo qatarta la saadaaliyay inay ka dhici karto Gobolada qaarkood.
Sidookale Wasiiru Dowlaha Wasaaradda Arrimaha Gudaha iyo Federaalka ahna ku-simaha Wasiirka Mudane Cabdirashiid Xidig oo kulanka kadib isna wareysi siiyay Warbaahinta Qaranka ayaa xusay in Hay’adaha Samafalka iyo Deeq bixyaasha ay u balanqaadeen Dowladda Somaaliya inay ka gacan siinayaan in dadka laga badbaadiyo qatarta fatahaadaha iyo abaaraha laga yaabo inay ka dhacaan qaar ka mid ah gobolada dalka.
Sodon Hay’ado oo ka shaqeeya Arrimaha Samafalka ayaa khamiistii lasoo dhaafay ka digay in 500,000-900,00 oo ah dadka ku nool Nawaaxiga Webiyada Jubba iyo Shabelle ay qatar ugu jiraan fatahaad ka dhalata dabeysha El-Nino iyo Roobab ay wadato, iyagoona sidoo kale saadaaliyay in Gobolada qaarkood ay ka dhici karaan Abaaro saameyn doona dad fara badan.
