Siihayaha Wasiirka Arrimaha gudaha iyo Federaalka ee Soomaaliya mudane Cabdullaahi Goodax Barre ayaa ku baaqay in si sharuud la’aan ah lagu joojiyo dagaallo saakay ka dhacay degmada Dhuusamareeb ee xarunta Gobolka Galgaduud, kaasi oo sababay dhimasho iyo dhaawac.
Mudane Cabdullaahi Goodax Barre oo shir jaraa’id ku qabtay xafiiskiisa ayaa sheegay in uu aad uga xumaaday marka uu maqlay dagaallo xalay iyo saakay siyaabo kala duwan uga dhacay magaalooyinka Guriceel iyo Dhuusamareeb ee gobolka Galgaduud, waxaana uu odoyaasha dhaqanka ka codsaday inay gacan ka geystaan dajinta xiisadaha colaadeed ee ka soo cusboonaaday deegaanno ka tirsan gobolkaasi.
Dagaalka ayaa saakay waxa uu ka dhacay magaalada Dhuusamareeb ee xarunta Gobolka Galgaduud, kaasi oo u dhexeeyay ciidamada dowladda iyo maleeshiyaad hubeysan, kaasi oo geystay qasaare isugu jirta dhimasho iyo dhaawac.
