Wasiirka Arrimaha Dibadda Soomaaliya Cabdisalaan Hadliye Cumar ayaa sheegay in Dowladda Federaalka ah ay u diyaar garowday soo celinta qaxootiga Soomaaliyeed ee ay colaaduhu ku qabsadeen dalka Yemen.
Wasiirka Arrimaha dibadda oo wareysi gaar ah siiyay laanta Af-ka Soomaaliga ee VOA-da ayaa tilmaamay in xukuumadda ay diyaarisay qorshe ku aadan sidii dalkooda dib loogu soo celin lahaa muwaadiniinta Soomaaliyeed ee Yemen ku sugan, isla markaana la qorsheeyay meelaha la dajin lahaa, iyadooo arrintaasi loo marayo dhanka badda u dhexeysa Soomaaliya iyo Yemen.
“Dadku waxa ay isugu jiraan labo arrimood, kuwa jecel inay dalkooda dib ugu soo laabtaan iyo kuwa aan rabin inaysan soo laaban, dowladda markasta waxaa ka go’an soo badbaadinta muwaadiniinteeda ku xaniban Yemen, runtii waxaan arrintaasi u adeegsaneynaa dhanka badda oo aan qorsheyneyno in aan soo kireyno Maraakiib iyo doonyo lagu soo daad gureynayo muwaaadiniinta Yemen ku sugan, hadana diyaarad ayaa jirta oo lagu soo qaadayo maatada” ayuu yiri Mudane Cabdisalaan.
Wasiirka arrimaha dibadda ee xukuumadda Soomaaliya ayaa ugu baaqay jaaliyadaha Soomaaliyeed inay gacan ka geystaan gurmad u fidinta Walaalahood Soomaaliyeed, meelkasta oo ay dunida kaga xanibanyihiin.
“Waxaan qurbo joogta ku guubaabin lahaa inay furaan sanduuq lagu gar gaarayo dadkeena tabaaleysan, $10, $20 iyo 100 doolar waxa ay awoodaan, taasi wax weyn ka tareysa gurmadka loo fidinayo qoysaska Soomaaliyeed ee dalka Yemen ku dhibaateysan” ayuu markale Wasiirka hadalkiisa ku daray.
