Wafdigan oo uu hoggaaminayay Wasiir ku-xigeenka Wasaaradda Caafimaadka ee Xukuumadda Federaalka Soomaaliya Dr. Axmed Xuseen Macalin Dr. Gurrey oo ay qayb ka ahaayeen mas’uuliyiin uu ka mid yahay lataliyaha arrimaha bulshada ee Xafiiska Madaxwaynaha Jamhuuriyadda Federaalka Soomaaliya Mudane Cali Faarax Seeraar ayaa waxaa garoonka diyaaradaha Dhuusamareeb ku soo dhaweeyay Wasiirka Caafimaadka Galmudug oo safarkan ku wehliyay, Agaaaimaha Guud ee Wasaaradda Caafimaadka Galmudug, Wasiiro ka tirsan Galmudug iyo Maamulka Dhuusamareeb.
Wasiirka Caafimaadka Galmudug Dr. Cabdiwali Cabdullaahi Jaamac ayaa sheegay in imaatinka Wafdiga uu muhiim u yahay ogaanshaha baahiyaha caafimaad ee deegaanka kajira.
Lataliyaha arrimaha bulshada ee Xafiiska Madaxwaynaha Jamhuuriyadda Federaalka Soomaaliya Mudane Cali Faarax Seeraar ayaa rajo wanaagsan ka muujiyey in kormeerkooda xoojin doono dadaallada lagu horumarinayo adeega aas-aasiga ah ee caafimaadka Deegaannada Galmudug.
Wasiir ku-xigeenka Caafimaadka Xukuumada Federaalka Soomaaliya Dr. Axmed Xuseen Macalin Dr. Gurrey ayaa sheegay in ujeeddada socdaalkooda ay la xiriirto u kuurgelidda adeegyada aas-aasiga ah caafimaadka ee ka jirta deegaananda Galmudug.
Safarkan oo qaadanaya muddo dhowr maalmood ah ayay wafdiga Wasiir ku-xigeenka Caafimaadka Xukuumada Federaalka Soomaaliya ku kormeeri doonaan xarumaha caafimaadka ee degmooyinka Galmudug, iyadoo lafilayo in ay uga sii gudbaan dowlad goboleedyada kale ee dalka.
