Wasiir ku-xigeenka Wasaaradda Waxbarashada Koonfur Galbeed ayaa daah furey kulan ku saabsan wadatashiga Waxbarashada iyo diyaarinta qorshaha istaraatiijiyadda Waxbarashada.
Mudane Cabdifataax Isaaq Maxamed Wasiir ku-xigeenka Waxbarashada oo la hadlay Radio Muqdisho ayaa sheegay in ujeedka kulanka uu ahaa mid wadatashi ah oo lagu diyaarinayo Istaraatiijiyadda Waxbarashada shanta sano ee soo socoto, isla markaana aan oga gol leenahay in la horumariyo Waxbarashada.
Wasiir ku-xigeenka ayaa xusay in xog aruurin lagu sameeyay dhibaaatooyinka heysta bahda Waxbarashada Koonfur Galbeed, loona baahanyahay in xal waara laga gaaro dhibaatooyinka ka jirta dhanka Waxbarashada, maadaama Dowlad Goboleedyada loo madax baneeyay inay diyaarsadaan baahiyaha Waxbarasho ee ka jirta deegaannada Koonfur Galbeed.
“Shirka waxaa ka soo qeyb galay bahda Waxbarashada, quburo ka socday Wasaaradda iyo aqoonyahano kale, waxaaana diiradda ku saareynaa sidii loo heli lahaa istaraatiijiyadda Waxbarashada oo xal u noqoneysa horumarinta tayada Waxbarashada, anaga oo kala hormarineyno baahiyaha ka jirta deegaannada Koonfur Galbeed”. Ayuu yiri mudane Cabdifataax.
Wasiir ku-xigeenka Wasaaradda Waxbarashada Dowlad Goboleedka Koonfur Galbeed ayaa sheegay in shirkii lagu soo gabo gabeeyay Garoowe, la isku afgartay in Dowlad Goboleedyada loo madax baneeyo qaadista imtixaanka dugsiyada Sare si loo daadajiyo adeegyada Waxbarashada, isla markaana ay dowladda Federaalka kor ma maamusho hanaanka loo qaadayo imtixaanka.
