Wasiir ku-xigeenka xanaanada Xoolaha dirta iyo daaqa ee xukuumadda Soomaaliya ayaa maanta booqasho uu ugu kuurgalayo howlaha dhoofinta Xoolaha ku tegay dekedda Muqdisho, gaar ahaan qeybta uu ku yaala Maxjarka xoolaha laga dhoofiyo halkaasi oo kulamo kula leeyahay mas’uuliyiinta maxjarka xoolaha.
Mudane Cabdinaasir Maxamed Gaarane oo la hadlay Radio Muqdisho ayaa tilmaamay in xarumihii ay lahayd Wasaaraddu ay gacanta ugu jiraan shaqsiyaad gaar ah, ayna ku dadaalayaan sidii dib loogu soo celin lahaa gacanta Wasaaradda.
“Wasaaraddu xarumaheeda way dayacanyihiin, ayna u baahantahay in Wasaaradda iyo ganacsadatada ay iska kaashadaan sidii dib u habeyn loogu sameyn lahaa, isla markaana xarumihii ay Wasaaraddu lahayd qaar ka mid ah waa la dagay, halka kuwa kalena ay qorsheyayaan inay kala goos goostaan oo ay dhismooyin ka sameystaan, balse aan loo dulqaadan doonin, dadka arrimaha nuucaasi oo kale ah ku dhaqmaya” ayuu yiri Cabdinaasir Gaarane.
Wasiir ku-xigeenka Wasaaradda Xanaanada Xoolaha Mudane Cabdinaasir Maxamed Gaarane ayaa xusay inay wadaan qorshe lagu tirakoobayo dhaqaatiirka xoolaha ee ka howlgallada dalka, si loo howlgeliyo, isla markaana loo qalabeeyo goobaha ay ka howlgalaan.
