Wasiirada Arrimaha dibadda ee Urur Goboleedka IGAD oo shirkoodii caadiga ahaa ugu soo gabo gaboobay Muqdisho ayaa ka dhoofay garoonka diyaaradaha Caalamiga ah ee Aadan Cadde.
Sii hayaha Wasiirka Arrimaha dibadda ee Soomaaliya mudane Cabdiraxmaan Ducaale Beyle iyo dibloomaasiyiin kale ayaa sagootiyay Wasiirada Arrimaha dibadda ee Urur Goboleedka IGAD, kuwaasi oo si nabad gelyo ah uga dhoofay garoonka diyaaradaha ee Muqdisho, iyagoo dib ugu laabtay dalalkii ay ka yimaadeen.
Wafdiga ayaa waxa ay socod ku mareen qeybo ka mid ah Muqdisho, halkaasi oo la adkeeyay amniga, waxaana ay dowladda uga mahadceliyeen xaqiijinta amniga caasimadda iyo horumarada kale ee ay dowladdu ku talaabsatay.
Siihayaha Wasiirka Arrimaha Dibadda ee Soomaaliya Mudane Cabdiraxmaan Ducaale Beyle oo sagootinta kaddib la hadlay Warbaahinta ayaa sheegay in go’aanadii ka soo baxay shirka Wasiirada Arrimaha dibadda ee IGAD uu ka mid ahaa in bisha March ee sanadkan gudaha caasimadda lagu qabto shirka Madaxweyneyaasha Urur Goboleedka IGAD, waxaana uu intaa ku daray in shirkii maanta ay Soomaaliya u tahay guul taariikhi ah.
