Wasiirka Wasaaradda Caafimaadka Soomaaliya Drs Fawziya Abiikar Nuur ayaa Heshiis iskaashi iyo wax wada qabsi la saxiixatay Wasiirka Wasaaradda Caafimaadka ee Dowladda Qatar Dr Xanaan Maxamed Al kawaari.
Heshiiskaan oo mudo badan laga soo shaqaynayay oo kol hore ay labada Wasaaradood isugu af garteen is fahan loo badalay heshiis ayaa maanta lagu hor saxiixay Madaxwayanaha Jamhuuriyada Soomaaliya iyo Amiirka Qatar.
Heshiiska ayaa wuxuu ku qotomaa iskaashi xagga tayaynta iyo tababarada howlwadeenada caafimaadka, sare u qaadidda tayada adeegyada isbitaallada iyo baahinta gurmadka deg degga ah iyo wax ka qabadka cudurrada faafa.
Sidoo kale heshiiska wuxuu Soomaaliya ka saacidayaa in la helo xarumo caafimaad oo bixiya adeegyo tayo leh iyo sidoo kale wuxuu Wasaaradda caafimaadka Soomaaliya ka caawinayaa in ay yeelato awoodda fulinta gurmadka deg dagga ah, tayanta isbitaalada guud ee dalka, qalabaynta xarumaha lagu daaweeyo bukaanada iyo hirgalinta mashaariic iyo adeegyo caafimaad oo hor leh guud ahaan laga hirgelinayo dalka.
Waxaa la filayaa in Gudiyo farsamo oo isku dhaf ah ay ka wada shaqeeyaan hirgalinta heshiiskan sidoo kalena ay yeeshaan qorshe howleed lagu fuliyo heshiiskaan taariikhiga ah.
Heshiiskaan wuxuu qayb ka yahay qorshayaasha guud oo ay Wasaaradda Caafimaadka Soomsaliya ka leedahay baahinta iyo fulinta daryeel caafimaad oo leh tayo, kobcinta iyo sare u qaadidda aqoonta iyo xirfada shaqaalaha caafimaadka Soomaaliya.
