Wasiirka Amniga Gudaha ee dowlad Goboleedka Galmudug mudane Maxamed Cabdi Aadan Gaboobe oo muddooyinkan ku sugnaa furimaha hore ee dagaalka Koonfurta Gobolka Mudug ayaa ka war bixiyay howlgalkii lagu jabiyay khawaarijta, isagoo ku sugan godadkii maanta laga saaray ee deegaanka Xaarxaar, oo dhaca koonfur Bari ee Bacaadweyne.
Wasiir Gaboobe ayaa sheegay in horumar balaaran laga sameeyay howlgallada Koonfurta gobolka Mudug, kooxda khawaarijtana ay ku jabeen halkaas, isagoo bogaadiyay ciidamada xoogga, kuwa Daraawiishta iyo xaq u dirirka deegaanka oo jab xooggan u geystay kooxdan arxanka daran.
Dagaalkii maanta ayaa kooxda khawaarijta ah looga dilay ku dhawaad 35 dhagar-qabe, waxaana halkaas looga furtay hubkii ay wateen, iyadoo laga saaray godadkii ay ku dhuumaaleysanayeen.
Dhanka kale Wasiir Maxamed Cabdi Aadan Gaboobe ayaa farriin adag u diray siyaasiyiin uu sheegay in ay ku howlanyihiin fashilinta howlgallada socdo, una raadinayaan dhaliilo hiillo u noqon kara kooxda gabalkeedu dhacay.
