Ku Simaha Guddoomiyaha Aqalka Sare ahna Guddoomiye Ku Xigeenka 1-aad ee Aqalka Sare Mudane Cali Shacbaan Ibraahim ayaa ka Tacsiyeeyay dadka ku Shahiiday Weerarka Bahalnimada ah ee khawaarijtu ku qaaday Dhalinyarada mujaahidiinta ee naftooda u huray Dadka iyo Dalka, kuwaa oo deganaa Guri Ku yaala Degmada C.casiis, isagoo rabi uga baryay naxariista jano in uu ka waraabiyo.
“Eebe naxariista jano haka waraabiyo Geesiyaasha ku Geeeiyooday Weerarkaasi naf la caarinimada ah, ee ka dhacay Degmada C.casiis, waxaan u tacsiyeynayaa Ehelada dadkii wax ku noqday weerarkaasi, waxaa ilaah mahadiis inta badan Dhallinyaradaasi qeybta ka ahaa kuwa horseeday in Khawaarijta awoodooda la wiiqo ee macawiisley, in la soo Badbaadiyay oo ay bad qabaan, Nama niyad jabineyso weerarada noocaan oo kale ah oo fulaynimada ah” ayuu yiri Guddoomiye Shacbaan.
Guriga la beegsaday ayaa ku dhegan Hoyga uu Deganyahay Guddoomiye Shacbaan waxaana Kooxda Weerarkaasi soo qaaday ay isku dayeen in ay u soo talaabaan Guriga Guddoomiyaha inkastoo Ciidamada la jooga oo feejignaan dheeri ah ay ka muuqato ay ka hortageen isku daygaas dhicisoobay, iyadoo ay bad qabaan Ilaalada Guddoomiyaha.
