Wasiirka Amniga Xukuumadda Soomaaliya Mudane Maxamed Abuukar Isloow ayaa muhiimadda uu leeyahay xeerka la dagaallanka Argagixisada ku sheegay in uu yahay sidii dalka looga ciribtiri lahaa Kooxda Argagixisada laguna xakameyn lahaa falal danbiyeedyada ka dhasha Argagixisada loona dhowri lahaa sarreynta sharciga iyo Xuquuqda aadanaha.
Wuxuu sheegay Wasiir Isloow in xeerkaan uu ka kooban yahay afar qeybood oo ka kooban 37-Qodob, sidoo kale, Wasiirka Amniga Xukuumadda Soomaaliya ayaa carrabka ku adkeeyay in xeerkaan uu waafaqsan yahay dastuurka KMG ah, isagoo dhanka kale caddeeyay in uu xeerkaan la jaan qaadayo qaraarrada la dagaallanka iyo ka hortagga Argagixisada ee ka soo baxa Qaramada Midoobay.
Wasiirka oo shalay hortagay Golaha shacabka ayaa caddeeyay in faa’idada uu xeerkaan leeyahay ay tahay in uu si cad u qeexayo wuxuu yahay Argagixiso iyo fal argagixiso, wuxuuna adkeynayaa cadaalada iyo daba galka, xaqiijinta iyo caddeynta danbiyada argagixisada.
Xildhibaannada Golaha Shacabka oo shalay kulan ku yeeshay Muqdisho ayaa waxay ka doodeen Hindise sharciyeedyo dhowr ah oo ay ka mid yihiin.
1:Ansixinta Soo jeedinta Guddiga Maaliyadda ee Miisaaniyadda Dowladda 2018
2:Akhrinta1-aad hindise Sharciyeedka la dagaallanka Arggagixisada
3:Akhrinta 1-aad ee Hindise Sharciyeedka xakameynta hubka wax dila.
Ansixinta Xeerka la dagaallanka Argagixisada ayuu muhiim u yahay sidii dalka looga cirib tiri lahaa kooxaha Argagixisada oo hadda gabalkooda uu sii dhacayo, waxaana hadda socda howgallo la doonayo in looga sifeeyo deegaannada fara ku tiriska ay ku harsan yihiin.
