Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya ayaa maanta guddoomay nuqullo ka mid ah warqadaha aqoonsiga danjiranimo ee Safiirrada cusub ee ka socda qaar ka mid ah dalalka Soomaaliya saaxiibka la ah.
Wasiirka ayaa si diirran u soo dhoweeyey safiirrada cusub ee ka kala yimid dalalka Ethiopia, Ghana, Mauritania, Mexico, Venezuela, Ivory Coast, iyo Iraq, isagoo u rajeeyey guul iyo horumar. Wuxuu muujiyey kalsoonida Dowladda Federaalka Soomaaliya ee ku aaddan in safiirradu si hufan, daacadnimo iyo xilkasnimo leh u gudan doonaan waajibaadkooda diblomaasiyadeed, isla markaana ay kaalin muuqata ka qaadan doonaan horumarinta xiriirka laba geesoodka ah.
Sidoo kale, Wasiirka ayaa ku booriyey safiirrada in ay mudnaanta siiyaan xoojinta xiriirka iskaashi, saaxiibtinimo, iyo dan-wadaag waara oo u dhexeeya dalalkooda iyo Jamhuuriyadda Federaalka Soomaaliya.
