Wasiirka Arrimaha Dibadda ee Jamhuuriyadda Federaalka Soomaaliya Dr.Cabdusalam Hadliye Cumer ayaa maanta ku qaabilay Xafiiskiisa Safiirka Jamhuuriyadda Shacbiga China u qaabilsan Soomaaliya Ambassador Wei Hongtian oo ay ka wada hadleen xiriirka soo jireenka ah ee labda dal,iskaashiga,fulinta barnaamijyo horumarineed iyo dhaqan-gelinta heshiisyo labada dowadood hore u kala saxiixdeen .
Kulanka ayaa ahaa mid diiradda lagu saaray danaha wadaagga ah iyo dardar-gelinta mashaariic dib u dhis oo laga fuliyo dalka Soomaaliya.
Kulankani oo ku dhammaaday jawi isfaham leh,ayaa waxaa goob joog ka ahaa lataliyeyaal ka tirsan Xafiiska Wasiirka iyo diblomaasiyiin ka howlgala Safaaradda China ee ee Caasimadda Muqdisho.
Waxaa xusid mudan,in Soomaaliya xiriir saaxiibtinimo oo aad u qoto-dheer ay la leedahay Xukuumadda iyo Shacabka China oo soo taxanaa muddo hadda laga joogo 600 sano,iyadoo Culimada iyo Ganacsatada China ay booqdeen deegaano kala duwan oo dalka Soomaaliya sanadkii 1420-kii (Miilaadiyah) si isdhaafsi ganacsi ,dhaqan iyo dhaqaale ula wadaagaan dadka Soomaaliyeed.
Dowladda China ayaa aqoonsatay qaranimada iyo gobonimada Jamhuuriyadda Soomaaliya 14 –kii bishii December sanadkii 1960 –kii ,taa badalkeeda Dowladda Soomaaliya waxa ay hormuud u aheyd,olole hogaamineed u noqotay dowladihii u codeeyay in dowladda China ay xubin buuxa oo joogta ah ka noqoto Golaha ammaanka, taasoo u suura-gelisay Xukuumadda Beijing inay yeelato awoodda codka qayaxan ee diidmada.
