Wasiirka Arrimaha Gudaha iyo Federaalka ee Xukuumadda Soomaaliya, Mudane Cabdiraxmaan Maxamed Xuseen (Odawaa), ayaa dhiggiisa dalka Turkiga kula kulmay magaalada Istanbul ee dalkaas oo uu u joogo howlo shaqo, iyagoo labada masuul ka wada hadlay arrimaha iskaashiga dhinacyada tayenta hey’adaha iyo maamullada wasaaradda gudaha.
labada wasiir, ayaa si faah-faahsan uga hadlay sidii loo xoojin lahaa xiriirka Somaaliya iyo Turkiga iyo in la dadajiyo dhammaan ballan-qaadyadii Madaxweynaha Turkiga u sameeyey Soomaaliya ee ku aaddanaa hirgalinta mashaariic horumar leh oo laga fulinayo Muqdisho.
Mudane Cabdiraxmaan Maxamed Xuseen (Odawaa), wasiirka Arrimaha Gudaha iyo Federaalka Soomaaliya, ayaa uga mahadceliyey dhiggiisa Turkiga soo dhoweynta uu u sameeyey iyo sida dowladdiisu u garab taagan tahay Soomaaliya, isagoo ballan-qaaday in laga faa’ideysan doono dhammaan mashaariicda Turkiga Soomaaliya uu talagalay.
