Wasiirka Awqaafta iyo Arrimaha Diinta Cabdulqaadir Sh. Cali Ibraahim (Baqdaadi) ayaa maanta furay dib u dhiska Masjidka Arbaca Rukun oo dhisan in ka badan 8 Qarni, masjidkaasi oo uu soo gaaray burbur lixaad leh.
Wasiir Baqdaadi ayaa sheegay in dhismaha Masjidkaan ay iska kaashanayaan Wasaaradda Diinta iyo Hay’adda Isra ee Dalka Turkiga, isaga oo sheegay in ujeedadu ay tahay in looga faa’ideeyo Umada Soomaaliyeed.
“Maanta waxaa farxad noo ah inaan dhegax dhigno Masjidka Taariikhiga ah ee Arbaco Rukun, maadaama uu Masjidka burburay, marka in dib loo dhiso ayaan dhegax dhignay, Hay’adda Isra ee Turkiga ayaa dhiseysa, ilaa idinkiisa, waxaan rajeyneynaa in ay ka faa’ideystaan Umada Soomaaliyeed”
Wasiirka Awqaafta iyo Arrimaha Diinta Cabdulqaadir Sh. Cali Ibraahim ayaa sheegay in dhismaha Masjidkaan Arbaca Rukun ay ku filan tahay Wasaaradda, hase ahaatee, waxa uu sheegay in Bulshada Soomaaliyeed looga baahan yahay socodsiinta Masjidka, si uu usii jiro muddo fog.
“Hay’adda Miisaaniyada ay inoo soo bandhigtay waa ay ku filan tahay, Masjidka Waqaf malaha, waxa uu u baahan yahay socodsiin Hay’ad ma biili karto mar walba, Marka Soomaalida waxaan u bandhigayaa inay Waqaf u sameeyaan oo ay dhameystirto waxa dhiman, oo ay wax uga soo baxaan si uu wakhti dheer usii jiro”
Masjidka Arbaca Rukun ee degmada Xamarweyne ayaa ka mid ah masaajidda ugu da’da weyn ee ka dhisan dalkeena Soomaaliya.
