Wasiirka Wasaaradda Beeraha iyo Waraabka Xukuumadda Federaalka Soomaaliya mudane Maxamed Cabdi Xayir Maareeye ayaa magaalada Nairobi ee dalka Kenya uga qaybgalay shirka Wasiirada Beeraha Afrika, kaas oo looga hadlay caafimaadka iyo bacriminta beeraha.
Wasiir Maareeye oo shirka khudbad ka jeediyey ayaa sheegay in Wasaaradda Beeraha iyo Waraabka dowladda Federaalka oo garowsan duruufaha gaarka ah ee ku xeeran beeraleyda Soomaaliyeed ay xoogga saarayso sidii wax looga qaban lahaa caqabadaha haysta beeraleyda.
“Anagoo og duruufaha gaarka ah ee ay ku jiraan beeraleyda iyo beeraha Soomaaliya, waxaanu ka Wasaarad ahaan ku dedaalaynaa Insha Allah in aanu intii awoodayada ah taageerno beeraleyda Soomaaliya, degaankana ka badbaadino khasaare ama nabaadguur kale oo soo gaara” ayuu yiri Wasiir Maareeye.
Shirka ayaa sidoo kale looga hadlay dhibaatada wadamada Afrika ka haysata nabaatguurka ciidda iyo isbadalka cimimada, waxaana shirku diiradda saaray in wax laga qabto caqabadaas.
