Wasaaradda Caafimaadka Xukuumadda Federaalka Soomaaliya ayaa warbixinta maalinlaha ah ee xogta Feyruska Karoona ku sheegtay in la diiwaan geliyay 325 xaalado cusub oo COVID-19 ah 48-kii saac ee la soo dhaafay, 22 qof ayaana u geeriyootay, waxaana ka bogsatay 91 ruux.
Wasiirka Caafimaadka iyo Daryeelka Bulshada Xukuumadda Federaalka Soomaaliya, Marwo Fowziya Abiikar Nuur ayaa caddeysay in xaaladaha cusub laga diiwaan geliyay Somaliland (179) Galmudug (39) gobalka Banaadir (28), Puntland (28) Hirshabeelle (27) Jubbaland (22) iyo Koonfur Galbeed (2) qof, 219 ka mid ah bukaannada la xaqiijiyay waa rag, halka 106-na ay yihiin haween.
Tirada xaaladaha COVID-19 ee dalka laga diiwaan geliyay ayaa gaartay 9,925 waxaa bogsootay 4,420 Ruux. guud ahaan 414 ruux oo kale ayaa u geeriyootay.
Marwo Fowziya Abiikar Nuur ayaa bulshada ka codsatay inay qaataan talooyinka caafimaad ee laga helayo khuburada caafimaadka ku takhasusay iyo wacyi gelinta kale ee bulshada lagu ogeysiinayo khatarta cudurkaan uu dadka ku keeni karo, maadaama uu markale soo labo kacleeyay halista cudurka COVID-19.
Dhinaca kale Wasiirka Wasaaradda Caafimaadka iyo Daryeelka Bulshadda Drs Fowziya Abiikar Nuur ayaa 16-kii bishan March lagu bilaabay Tallaalka COVID-19 ee ugu horeeyay gudaha dalka Soomaaliya.
Wasiirr Fowsiya ayaa noqotay qofkii ugu horeeyay ee lagu bilaabay Tallaalka ka hortaga Caabuqa COVID-19 ee AstraZeneca, kaasi oo haatan si habsami leh uga socda gudaha dalka.
