Sacuudi Carabiya ayaa sheegtay weerar loo adeegsaday diyaaradaha drones lagu qaaday xarun shidaal oo ku taala caasimadda Riyadh jimcahan maanta ah, waxaana ka dhashay in uu dab qabsado dhismaha.
Wakaaladda wararka SPA oo soo xiganaysa saraakiisha wasaaradda tamarta ayaa sheegay in weerar subaxnimadii hore ee maanta lagu qaaday warshadda shidaalka uusan geysan dhaawac ama burbur hanti isla markaana uusan saameynin shaqada warshadda.
“Warshadda sifeynta shidaalka ee Riyadh ayaa lagu weeraray drones waxaana ka dhashay dab inkastoo ugu dambeyn lagu guuleystay in la bakhtiyo,” ayaa lagu yiri bayaanka wasaaradda.
Sidoo kale, dalalka caalamka ayaa loogu baaqay in ay Sacuudiga ku garab istaagaan la dagaalanka argagaxisada ku soo gardaroonaysa Sacuudiga.
Goor hore oo jimcahan maanta ah, ayaa Xuuthiyiinta Yemen waxay sheegeen in ay drones ku weerareen xarumaha shirkadda shidaalka Sacuudiga ee Aramco.
Sacuudi Carabiya ayaa cambaareysay weerarka waxayna sheegtay in waxa la beegsaday ay tahay “nabad geliyada iyo xasiloonida saheyda shidaal ee caalamka”.
Ma jiro wax war ah oo ka soo baxay shirkadda Aramco ee ku aadan weerarka.
Xuuthiyiinta ayaa todobaadyadii u dambeeyay kordhiyay weerarada ay la beegsanayaan dalka ugu soo saarka badan shidaalka caalamka ee Sacuudi Carabiya.
Afhayeenka kooxda Yaxye Sareeco ayaa sheegay in lix drones ay saaka ku weerareen shirkadda shidaalka Sacuudiga ee Aramco. Isagoo intaas ku daray in ay sii wadayaan weerarada noocaan ah.
Isbaheysiga Sacuudiga hogaamiyo ayaa Yemen kula dagaalamaya Xuuthiyiinta tan iyo 2015, dagaaladaas waxaa ku dhintay in ka badan 130,000 oo shacab u badan halka malaayiin kale dani biday in ay ka hayaamaan guriyahooda cabsi darteed.
