Wasiirka Wasaaradda Caafimaadka iyo Daryeelka Bulshada Dr Cqli Xaaji Aadam oo uu wehliyo Wasiiru Dawlaha Wasaaradda Dr Maryam Maxamad Xuseen Duuliye ayaa Kulan la qaatey Safiirka Jaamacadda Carabta u fadhiya Soomaaliya Amb. Salah Elguneid. Waxaa kulanka goob joog ka ahaa agaasimaha guud ee Wasaaradda Caafimaadka Dr Cabdinasir Mukhtaar Ibraahim iyo qaar kamid ah la taliyaasha Wasaaradda.
Wasiirka ayaa ugu horeyn ku bogaadiyay Ururka Jaamacadda Carabta taageerada iyo garab istaagga joogtada ah ee ay siiyaan shacabka iyo Dawlada soomaaliya, isagoo ku adkeeyey xoojinta iyo sii wadista taageeradooda ku aadan dhanka Caafimaadka.
Amb.Salah Elguneid ayaa dhankiisa ka war bixiyay mashariicda ay Soomaaliya ka taageeraan wuxuu sidoo kale cadeeyey in ay Wasaarada kala shaqeyn doonaan tayaynta Isbitaalada Dowladda ee ay gacanta ku heyso Wasaaradda Caafimaadka, iyo sidoo kale sare u qaadista xirafadda Dhaqaatiirta Soomaaliyeed ee ka howlgala Isbitaalada Dalka.
Ugu dambayntii waxaa la isku raacay xoojinta iyo dardargelinta mashaariicda Caafimaad ee ay Jaamacadda Carabta ka fuliso Soomaaliya si looga jawaabo xaaladaha Caafimaad darro ee ka dhashay abaaraha ka dilaacay dalka, gaar ahaan sida nafaqo darrada iyo koleeraha.
