Mas’uuliyiinta Wasaaradda Caafimaadka iyo wafdi sare oo ka socday WHO oo dhawaan dalka soo gaaray ayaa ka wada hadlay sidii uu qofwalba oo Soomaali ah u heli lahaa caafimaad aasaasi ah oo dhameystiran
Kulankan oo cinwaan looga dhigay helidda adeeg caafimaad oo loo dhanyahay ayaa waxaa ka qeyb galay Mas’uuliyiinta Wasaaradda caafimaadka Soomaaliya iyo wafdi sare oo ka scoday hey’adda caafimaadka adduunka ee WHO kuwaas oo dhawaan dalka u yimid inay qiimeeyaan xaaladaha caafimaad ee dalka ka jira .
Labada dhinac ayaa inta uu kulanka socday waxey ka wada hadleen qaabka loo wajahayo halbeegyada caafimaad si loo gaaro hadafka ugu dambeeya oo ah in la helo caafimaad loo dhanyahay oo ay ka faa’iideystaan bulshada Soomaaliyeed ee ku sugan dalka oo dhan.
Agaasimaha guud ee Wasaaradda Caafimaadka Soomaaliya Cabdullahi Xaashi Cali oo kulanka kadib Warbaahinta la hadlay ayaa sheegay inay labada dhinac ka wada shaqeyn doonaan sidii qof walba oo Soomaali ah uu u heli lahaa caafimaad aasaasi ah oo dhamaeystiran.
Wafdiga sare ee ka scoda hey’adda caafimaadka adduunka ee WHO oo uu hogaaminayo Agaasimaha Guud ee caafimaadka loo dhanyahay Peter Salama ayaa muddada ay dalka joogaan waxay booqan doonaan meelo badan, waxeyna Wasaaradda caafimaadka kala shaqeyn doonaan sidii looga gudbi lahaa caqabadaha caafimaad ee taagan.
