Shirka Caafimaadka Adduunka kisii 77-aad oo si rasmi ah uga furmay maanta magalaada Geneva ee dalka Switzerland ayaa waxaa Wasiirka Wasaaradda Caafimaadka iyo daryeelka bulshada Xukuumadda Federaalka Soomaaliya Dr. Cali Xaji Aadan loogu doortay inuu noqdo Madaxweyne ku xigeenka Golaha Shirwaynaha Caafimaadka Adduunka.
Golahan oo sanad walba mar ku kulma Xarunta Qaramada Midoobay ee Geneva, ayaa waxaa lagu lafa-guraa hawlaha hortabinta u leh Caafimaadka Adduunka, waxaana lagu gaaraa go’aamo masiiri ah oo saameeya wadamada Adduunka oo dhan.
Sanadkan waxyaabaha shirkan Caafimaadka Adduunka looga doodaya waxa ugu horeeya hindise ay Wasaaradda Caafimaadka ee Soomaaliya soo jeedisay, kaas oo ujeedadiisu yahay in Adduunku uu u midoobo yaraynta dhimashada Hooyada iyo Dhallaanka, si loo gaaro hadafka guud ee golaha, taas oo muujinaysa in Soomaaliya ay ciyaareyso door muhiim ah oo ka dhax muuqda guud ahaan golaha iyo miiska arrimaha Caafimaadka ee Adduunka.
Dhanka kale, waxaa aad looga doodi doonaa qabyo-qoraalka heshiiska caalamiga ah ee ka hortagga xanuunnada awooda u leh in ay faafaan ee keena cudurada dilaaca ee dhibaato ba’an ku haya guud ahaan dunida wadamo badan oo xaaladahaasi la daalaa dhacayana ay hadda miiska joogaan, sidoo kale waxay muujinaysaa in dunida meel qura kaga soo jeesatey xal u helidda xaalad kasta oo Caafimaad.
Wafdiga Soomaaliya ee uu hogaaminayo Wasiirka Caafimaadka XFS waxaa ka mid ah Agaasimaha Guud ee Wasaaradda Caafimaadka iyo daryeelka bulshada Xukuumadda Federaalka Soomaaliya Dr. Guled Cabduljalil, Agaasimaha Machadka Caafimaadka Dr. Xuseen Muxiyadiin, Agaasimaha Guud ee Wasaaradda Caafimaadka Jubbaland, Agaasime Waaxeedyo iyo Lataliyayaal.
