Wasiirka Wasaaradda Caafimaadka Xukuumadda Federaalka Soomaaliya Dr, Cali Xaaji Aadan ayaa maanta booqasho ku tagay Machadka Caafimaadka Qaranka (NIH), waxaana ku soo dhaweeyay agaasimaha guud Machadka, Dr Xuseen Abuukar Muxiyadiin. Ujeeddada booqashada Wasiirka ayaa ahayd u kuurgelidda howlaha uu Machadka u hayo Bulshadda iyo Qaranka.
Sidoo kale mudadii uu Wasiirka ku guda jiray Booqashadiisa waxa uu warbixino ka dhegeystay Masuuliyiinta machadka, ayagoo Warbixino ka siiyay guulaha, caqabadaha iyo howlaha hortabinta leh ee Machadka Caafimaadka Qaranka (NIH).
Wasiirka Wasaaradda Caafimaadka iyo daryeelka Bulshada Dr. Cali Xaaji Aadan, ayaa ugu danbeentii bogaadiyay shaqaalaha Machadka dhabar adeega ay u muujinayaan shaqada, waxa uuna kula dardaarmay in ay dedaalka sii laba jibbaaraan.
Booqashada Wasiirka ayaa hoosta ka xariiqday dadaalka Wasaarada Caafimaadka Soomaaliya ay ugu jirto sidii loo dhisi lahaa awoodda cilmi baarista caafimaadka gudaha, waxaana uu Wasiirku rajo wanaagsan ka muujiyay in Machadka Caafimaadka Qaranka (NIH) ay gacan ka geysan doonto sidii loo horumarin lahaa natiijooyinka caafimaadka Qaranka.
