Wasiirka Wasaaradda Caafimaadka iyo daryeelka bulshada Xukuumadda Federaalka Soomaaliya Dr. Cali Xaaji Aadam ayaa magaalada kampala uga qayb galay dood cilmiyeed ay soo qabanqaabisay madasha Kasmaal oo ay ka qayb galeen Ardeyda Soomaaliyeed ee dalka Uganda ka barata Culuumta Caafimaadka.
Wasiirka ayaa Ardeyda kala hadlay xaaladda guud ee dalka iyo halka ay wax marayaan waxa uuna xog wareystey Caqabada heysata Ardeyda Caafimaadka ee wax ka barata dalka Uganda, waxa uuna tilmaamay in heerka horumarineed ee Caafimaadka Soomaaliya uu ku jiro geedo soo bilowdey xili hore hadana maraya meel fiican oo hoga tusaalaynayso gaarista yoolka dowladda ee Caafimaadka Dalkeena.
Wasiirka ayaa sidoo kale ka qeyb galey madasha Kasmaal oo ah madal dood Cilmiyeed taas oo looga hadlayey Maalgelinta daryeelka Caafimaadka Soomaaliya iyo caqabadaha kutiirsanaanta maalgelinta deeq bixiyeyaasha.
Madashan ayaa fursad siineysay Ardayda baratay Caafimaadka iyo dhallinyaradda aqoonyahanada ah ee Soomaaliyeed oo danaynaysa in ay helaan macluumaad ku saabsan arrimaha Maalgalinta Caafimaadka iyo guud ahaan geedi socodka Caafimaadka dalka.
Ugu dambeyn Wasiirka Wasaaradda Caafimaadka iyo daryeelka bulshada Xukuumadda Federaalka Soomaaliya Dr Cali Xaaji Aadan ayaa booqday xarunta Safaaradda Soomaaliya ee dalka Uganda, halkaas oo ay kusoo dhaweeyeen Diblomaasiyiinta Soomaaliyeed ee ka howlgala Safaaradda.
