Kulankaan dood wadaaga ah ee Dhibaatooyinka Musuq –Maasuqa iyo sida loo horumarin karo howlaha dowladda oo ay soo qaban qaabisay Wasaaradda Cadaaladda Xukuumadda Federaalka Soomaaliya oo ay ka qayb galayaan qaar ka mid ah hay’adaha dowladda iyo bulshada rayidka ayaa waxaa furay wasiirka Wasaaradda Cadaaladda Mudane Xasan Xuseen Xaaji waxaana uu socon doonaa labo maalin oo ay ka qayb galayaashu ka doodi doonaan musuqa iyo sidii looga cirib tiri lahaa dalka.
Xoghayaha joogtada ah ee Wasaaradda Cadaaladda XFS Dr Ismaaciil Jimcaale Calasow, oo ka hadlay furitaanka dood wadaagaan ayaa sharaxaad ka bixiyay Muhiimada loo qabtay kulankaan iyo waxyaabaha looga hadli doono mudada labada maalin ah ee uu socdo.
Wasiirka Wasaaradda Cadaaladda Xukuumadda Federaalka Soomaaliya Xasan Xuseen Xaaji oo si rasmi ah u furay Shirka ayaa sheegay in muhiimadda laga leeyahay ay tahay, in Soomaaliya oo waqti dheer kaalmo hooseeya kaga jirta Musuqa iyo wax is daba marinta hadda waji ka duwan kaas loo horseedo .
“waad ku mahadsan tihiin sida wanaagsan ee aad uga soo qayb gasheen, Shirkaan Muhiimada loo qabtay waa inaan helno hanaan wanaagsan oo looga hortago Musuq maasuqa waxaana ku casuumnay wasaarado dhowr ah sida wasaaradda Maaliyadda, xafiiska xisaabiyaha guud iyo xafiiska Hanti dhowrka guud waxaan idinku boorinayaa inaad soo saartaan dood wax ku ool ah mudada labada maalin ah ee shirku uu socdo” ayuu yiri wasiirka.
