Wasiirka Wasaaradda Cadaalladda iyo Arrimaha Garsoorka ee Hirshabeelle Mudane Cabdiqaadir Cismaan Cabdisalaan ayaa maanta u furay odoyaasha dhaqanka ee Hirshabeelle siminaar la xiriira habka xalinta khilaafaadka dadban oo afka qalaad loo yaqaan Alternative Dispute Resolution (ADR Center).
Siminaarkan oo ay soo qaban qaabisay Wasaaradda Cadaaladda iyo arrimaha Garsoorka ee Hirshabeelle ayaa waxaa ka qeyb galay odoyaasha dhaqanka ee ku nool deegaannada Hirshabeelle, kuwaasi oo lagu barayay xeerka nidaamyada garsoor dhaqameedyada hirshabelle, si bulshada loo gaarsiiyo cadaalad waarta iyo doorka ay odoyaasha dhaqanka ku leeyihiin Nidaamkan.
Qaar ka mid ah odoyaasha dhaqanka ee ka qeyb galay siminaarka ayaa xusay inay dhankooda diyaar u yihiin dhaqalinka nidaamka xalinta khilaafaadka dadban.
Xildhibaan Nuur Xaashi oo ka mid ah mudanayaasha Baarlamaanka ee Hirshabelle ayaa odoyaasha ugu baaqay inay ka faa’iideystaan siminaarkan ku saabsan habka xalinta khilaafaadka dadban.
Wasiirka Wasaaradda Cadaalladda iyo Arrimaha Garsoorka ee Hirshabeelle Mudane Cabdiqaadir Cismaan Cabdisalaan ayaa tilmaamay in Wasaaradda ay ka go’antahay tayaynta nidaamka xalinta khilaafaadka dadban, isagoo xusay in Wasaaraddu ay hirgelisay xarun ay ku shaqeynayaan odoyaasha dhaqanka, si bulshada Hirshabeelle ay u helaan nidaam cadaaladeed.
