Shirkaan oo sanadkiiba mar la qabto ayaa waxaa diirada lagu saaraa arrimaha Garsoorka iyo sidii loo horumarin lahaa Hannaanka Caddaaladeed, waxaana shirka lagu qabtay magaalada New York ee dalka Mareykanka Soomaaliya uga qayb galay Wasiirka cadaaladda dalka Mudane Xasan Xuseen Xaaji oo shirkaas ka jeediyay khudbad dheer oo uu uga hadlay hannaanka Garsoorka Soomaaliya.
Wasiirka ayaa khudbadiisa waxa aa uu diiradda ku saaray sida ay dowladda Soomaaliya uga go’antahay in la horumariyo hannaanka caddaallada dalka iyo dadku u helan garsoor hufan, waxaa uu Wasiirku halkaa ka sheegay in Wasaaraddu ay sida ugu dhaqsiyaha badan u dhisi doonto golaha Adeega Garsoorka Dalka, sidoo kale ay sameyneyso guddiga la dagaallanka Musuq Maasuqa kuwaas oo aan hadda jirin .
“Waxaa hadda jira wax yar oo hor u kac ah oo laga sameeyay dhanka Garsoorka afartii sano ee ugu dambeysay, Madaxweynaha iyo Ra’iisul Wasaaraha waxaa ka go’an in Garsoorka la horumariyo, waxaase jira caqabado badan oo cadaallada dalkeena horyaalla sida amni darada iyo awoodda dowladda oo aan ku filneyn”ayuu yiri Mudane Xaaji.
Wasiirka ayaa intii uu New York ku sugnaa waxaa uu kulan la qaatay mas’uuliyiin badan oo ka mid ahaa ka qayb galayaasha shirka, waxaana ka mid ah xubnaha uu la kulmay haweeneyda ugu sareysa Hay’ada UNDP ee Qaramada Midoobay u qaabilsan horumarinta, waxaa sidoo kale uu khudbadiisa kaga codsaday Caalamka in dowladda Soomaaliya laga gacan siiyo dhismaha machadka tababarada Garsoorayaasha, taas oo qayb weyn ka qaada karta horumarinta caddaallada.
