Wasiirka Wasaaradda Deegaanka iyo Isbadalka Cimilada Xukuumadda Federaalka Soomaaliya Mudane Bashiir Maxamed Jaamac iyo wafdi uu hoggaaminayo oo howlo shaqo u jooga dalka Kenya, isla markaana uu wehlinayo Danjiraha Dowladda Soomaaliya ee dalka Kenya Danjire Jabriil Ibraahim Cabdulle ayaa kormeer shaqo ku tegay xarunta Wasaaradda Deegaanka ee dalka Kenya, halkaasi oo uu ku soo dhaweeyay Wasiirka Deegaanka iyo isbadalka Cimillada Kenya Aadan Barre Ducaale.
Intaa kadib labada Wasiir iyo mas’uuliyiinta kale ee la socotay ayaa yeeshay kulan is xogwareysi ah, iyadoo kulanka diiradda lagu saaray xoojinta wadashaqeynta labada Wasaaradood, Wanaajinta Xiriirka labbada dal iyo Ilaalinta deegaanka.
Labada Wasiir ayaa sidoo kale waxa ay isla meel dhigeen Ilaalinta iyo ka hortegidda xaalufinta Dhirta oo muhiimad gooni ah u leh Dadka iyo deegaanka, waxaana ay si wadajir ah u qireen in isbeddelka ku yimid cimilada uu saameyn ku yeeshay bulshada labada dal ee Soomaaliya iyo Kenya.
Danjire Jabriil Ibraahim Cabdulle oo isna kulanka ka hadlay ayaa xusay in Labada dowladood ay lagama maarmaantahay inay kala saxiixdaan heshiis is-afgarad ah (MOU) oo ku saabsan horumarinta deegaanka, isla markaana la magacaabo guddiyo farsamo oo arrintaas dardargeliyo.
Dowladda Soomaaliya ayaa waxa ay dadaal ugu jirta sidii ay u yareyn lahayd saameynta isbeddelka cimilada uu ku yeeshay bulshada, iyadoo mararka qaar dalkeenu ay ka jiraan abaaro baahsan, xilina ay dadku ka barakacaan fatahaado.
