Aqoon kororsigan oo ku aadan sare u qaadista amniga tayeynta xirfadaha iyo adeegsiga qalabka baarista xirfadlayaasha garoonka Aadan Cadde ayaa maanta lagu soo gabagabeeyay garoonka Aadan Cade ee magaalada Muqdisho.
Tababarkan oo socday 10- casho ayna ka qeyb galeen 16 qof oo ka mid yihiin howl-wadeennada xafiisyada hay’adda duulista rayidka iyo xafiiska maamulka guud ee maareeyaha garoonka ayaa lagu baranayay mashiinnada baarista ee yaala garoonka iyo qalabka gacanta ee baarista oo lagu baaro rakaabka iyo dadka isticmaala garoonka.
Nancy panyera oo ka mid ahayd dadkii gacan ka geystay ayaa sheegtay inuu tababarku ka qeyb qaadan doono illaalinta rakaabka iyo garoonka.
Maareeyaha hay’adda duulista rayidka Axmed Macalin Xasan oo ka hadlay madasha ayaa sheegay in koorsadan ay horumarinayso aqoonta howl-wadeennada amniga garoonka.
Wasiirka gaadiidka iyo duulista hawada mudane Duraan Axmed Faarax oo soo xiray tababarkan ayaa ugu baaqay in dhammaan dadka ka howl-gala garoonka la siin doono fursadda tababarkan si loo illaaliyo amniga iyo shuruucda garoonka.
