Wasiirka Wasaaradda Gaashaandhigga Jamhuuriyadda Federaalka Soomaaliya, Danjire Ahmed Macalim Fiqi ayaa maanta la kulmay Danjire Harriet Mathews, Agaasimaha Guud ee Arrimaha Afrika iyo Americas ee Xafiiska Arrimaha Dibadda Dawladda Ingiriiska. Wefdiga ay hoggaaminaysay Danjire Mathews waxaa ka mid ahaa Danjiraha Dawladda Ingiriiska u fadhiya Soomaaliya, Michael Nithavrianakis.
Wadahadallada ayaa si gaar ah diiradda loogu saaray hawlgallada socda ee Khawaarijta looga soo horjeedo, Hawlgalka Midowga Afrika ee Soomaaliya (AUSSOM) iyo qorshihiisa kala-guurka, iskaashiga labada dal ee dhinacyada difaaca iyo la-dagaallanka argagixisada, iyo doorka muhiimka ah ee Dawladda Ingiriisku ka qaadanayso dadaalladaas. Waxaa sidoo kale si gaar ah loo xusay kaalinta muhiimka ah ee Dawladda Ingiriisku ka qaadato taageerada Soomaaliya ee dhinacyada amniga iyo horumarinta awoodda ciidamada.
Wasiirka Gaashaandhigga, Danjire Axmed Fiqi, ayaa Dowladda Ingiriiska uga mahadceliyay doorka firfircoon iyo taageerada joogtada ah ee ay siiso Soomaaliya, gaar ahaan dhanka amniga iyo dib u dhiska hay’adaha dowliga ah.
