Wafdigan Wasiirka Wasaaradda Gaashaandhigga ee Xukuumadda Soomaaliya Janaraal Cabdul qaadir Sheekh Cali Diini oo maanta gaaray magaalooyinka Dhuusa Mareeb iyo Guriceel ee gobolka Galgaduud ee bartamaha dalka ayaa waxaa kamid ah saraakiil ka tirsan ciidanka xooga dalka Soomaaliya.
Garoonka diyaaradaha ee magaalada Dhuusa Mareeb ee xarunta gobolka Galgaduud ayaa waxaa si diiran ugu soo dhaweeyay mas’uuliyiinta maamulka gobolka , odayaal iyo qaar kamid ah bulshada magaalada Dhuusa Mareeb waxaana Wasiirka uu kulan la yeeshay maamulka iyo odayaasha Dhaqanka.
Intaasi ka dib Wafdiga Wasiirka Wasaaradda Gaashaandhigga ayaa u gudbay magaalada Guriceel isla gobolka Galgaduud iyadoo safar Dhulka ah ku tagay magaalada Guriceel, markii ay halkaasi gaareen ayaa waxaa soo dhaweeyay qeybaha bulshada iyo maamulka magaalada Guriceel.
Wasiirka Gaashaandhigga Soomaaliya ayaa waxaa uu inta uu Guriceel ku sugan yahay uu kulan la qaadan doonaa saraakiisha Ahlusna oo ku sugaan Guriceel , waxaa uu sidoo kale uu booqan doonaa Dugsiga tababarada ee Ciidanka Xoogga dalka Soomaaliyeed ee Har-qaboobe oo ku yaala magaalada Guriceel iyo Xirada 21 aad ee Ciidanka Xoogga.
