Muqdisho, April 6, 2015….Wasiirka Gaashaandhigga Soomaaliya Mudane C/qaadir Sheekh Cali Diini oo maalmahan socdaal shaqo ku joogay degmada Caabudwaq ee gobolka Galgaduud, ayaa maanta soo gaba-gabeeyay socdaalkiisii, kadib markii uu kulamo kala duwan oo diiradda lagu saarayay arrimaha maamul dhisidda gobollada dhexe uu halkaas kula qaatay qeybaha bulshada ee deegaanada Waqoyig Galgaduud. Ujeedada kulamadan ayaa ahaa sidii xal waara oo dib u heshiisiineed loogu heli lahaa dadka deegaanka si maamulka ay sameysanayaan uu u noqdo mid loo dhan yahay oo si nabad ah ay dadka deegaanka uga wada qeybqaataan.
Mudane C/qaadir Sh. Cali Diini oo ka qeyb galay munaasabad lagu soo gaba-gabeynayay shirarkii u socday 4ta casho ayaa sheegay in uu aad ugu farax san yahay natiijada laga gaaray wada xaajoodkii u socday, isagoo intaa ku daray Wasiirku in dowladda ay mar waliba garab taagantahay dhaqan gelinta go’aanada dib u heshiisiineed ee ka soo baxay shirka isla markaana ay madaxweynaha iyo Xukuumadda gaar siin doonaan tallooyinkooda.
“Waxaan idin kaga mahad celinayaa sida aad diyaarka ugu tihiin in aad doorka idin kaga aadan dhismaha maamulka Gobollada dhexe aad qaadataan, dhamaan teen maanta waan guuleysanay waxana rajeynayaa in howlaha dhiman ay dhameystiri doonaan xubnaha haray sida Wasiir ku xigeenka Dastuurka iyo Xildhibaanada oo idin la joogi doona”ayuu yiri Wasiirka.
Ugu danbeyn, Ugaaska deegaanka Ugaas Axmed Barre Cali oo kulanka ka hadlay ayaa sheegay dhankooda in ay ka go’an tahay in ay tagaan meel walba oo lagu dhisayo maamulka Gobollada dhexe isla markaana ay diyaar u yihiin kaalinta kaga aaden inay qataan.
—-DHAMMAAD—
