Wasiirka Wasaaradda Ganacsiga iyo Warshadaha xukuumadda Federaalka Soomaaliya Mudane Khaliif Cabdi Cumar, ayaa maanta magaalada Istanbul ee wadanka Turkiga kaga qeyb-galay madasha iskaashiga dhaqaalaha iyo ganacsiga ee Turkiga iyo dalalka Afrika kaas oo loogga hadlay arrimo la xidhiidha xoojinta iskaashiga, ganacsiga, maal-gashiga iyo Tiknoolajiyadda.
Shirka ayaa waxa Wasiirka ku wehelinaayey Safiirka Soomaaliya ee Turkiga Amb. Jaamac Caydiid Maxamed, u-qaabilsanaha Ganacsiga ee safaaradda Soomaaliya ee Turkiga Mardiya Maxamed Cabdi iyo mas’uuliyiin kale.
Soomaaliya iyo Turkiga, ayaa leh xidhiidh ganacsi oo soo jireen ah,iyada oo Soomaaliya ay dalkaasi u dhoofiso badeecado kala duwan oo muhiim sidoo kalena sanad ba sanadka ka dambeeya ay sii kordhayaan wax-soo-saarka dalka ee loo dhoofiyo dalkaasi. Waxa kale oo,iyadu na xusid mudan in dhawaan la dhammeystiri doono heshiiska TEPA ee iskaashiga dhaqaalaha iyo ganacsiga ee u dhaxeeya dalalka Soomaaliya iyo Turkiga kaas oo kor u sii qaadi doona suuqyadii ganacsi ee Soomaaliya, fududeynta wax is dhaafsiga, dheeli-tirka ganacsiga iyo weli ba horumarinta dhinacyada Maal-gashiga iyo Dhaqaalaha.
