Wasiirka Wasaaradda Howlaha Guud ee Xukumadda Federaalka Soomaaliya Mudane Maxamed Aadan Macalin (Maaxamed Soomaali) oo safar shaqo ku jooga magaalada Baydhabo iyo Madaxweynaha dowlad Goboleedka Koofur Galbeed Soomaaliya Mudane Cabdicasiis Xasan Maxamed Lafta-gareen ayaa maanta waxa ay si wadajir ah u dhagax dhigeen waddo laami ah oo laga dhisayo gudaha magaalada Baydhabo.
Waddadaan oo gaareysa Afar kilo mitir ayaa waxaa dhismaheeda iska kaashayaan dowladda Federaalka Soomaaliya iyo maamulka Koofur Galbeed, waana wajiga koowad ee dhismaha ilaa iyo saddex waddo oo laga hirgelin doono gudaha magaalada Baydhabo.
Wasiirka Wasaaradda howlaha ee Xukumadda Federaalka Soomaaliya Mudane Maxamed Aadan Macalin (Maaxamed Soomaali) ayaa sheegay in mashaaric kale oo qeyb-ka ah dhimaha waddooyinka ay ka hirgelin doonaan magaalada Baydhabo ee xarunta Gobolka Baay, isla markaana xarunta KMG u ah dowlad Goboleedka Koonfur Galbeed.
Madaxweynaha Dowlad Goboleedka Koofur Galbeed Soomaaliya Mudane Cabdicasiis Xasan Maxamed Lafta-gareen ayaa uga mahadceliyay dowladda Federaalka dhismaha jidadkaan oo marin muhiim iyo halbowle u ah bulshada ku dhaqanka Baydhabo,
Mashruucaan ayaa qeyb ka ah dhismaha waddooyin waa weyn oo ay Wasaaradda Howlaha Guud ee Dowladda Federaalka Soomaaliya ka hirgelineyso dhamaan magaalooyinka dowlad goboleedyada dalka iyo Gobolka Banaadir, si loo soo celiyo bilicdii ay hore u lahaayeen iyo sidoo kale dhismaha kuwa kale oo horleh.
