Wasiirka Isgaarsiinta iyo Teknolojiyada Xukuumadda Federaalka Soomaaliya mudane Maxamed Aadan Macalin Cali ayaa kulan la qaatay ku simaha Safiirka Safaaradda Shiinaha ee Soomaaliya Mr. Chen Wendi.
Kulankan ayaa ku saabsanaa xoojinta xiriirka saaxiibtinimo ee ka dhaxeeya labada dal iyo Iskaashiga dhinaca horumarinta Teknolojiyada iyo Isgaarsiinta.
Sii hayaha Safiirka Safaaradda Shiinaha ee Soomaaliya Chen Wendi ayaa soo dhoweeyay Wasiirka, waxa uuna ka mahadceliyey booqashada uu ku soo gaaray Safaaradda, isagoo ammaanay dedaalka uu gelinaayo horumarinta Isgaarsiinta iyo Teknoolojiyadda Soomaaliya oo ah halka ugu dhow ee adduunyadu ay kula tartami karaan.
Wasiirka Isgaarsiinta iyo Teknolojiyada Xukuumadda Federaalka Soomaaliya mudane Maxamed Aadan Macalin Cali (Soomaali) ayaa ugu Mahadceliyey Dowladda Shiinaha garab istaagga iyo taageerada ay siiso Shacabka Soomaaliyeed.
“Maanta waxaa booqasho ku tegay Safaaradda Shiinaha ee Soomaaliya, waxaan ka wada hadalnay sidii loo xoojin lahaa iskaashiga horumarinta Isgaarsiinta iyo Teknaloojiyadda, maadaama dowladda Shiinaha ay ka midtahay wadamada ugu horeeya ee horumarka ka gaaray tegnoloojiyadda”. Ayuu yiri Wasiirka Isgaarsiinta.
Wasiirka Isgaarsiinta iyo Teknoloojiyadda Soomaaliya ayaa wada qorshe ballaaran oo dib loogu habeynayo hannaanka ay u shaqeyso Wasaaradda iyo sidii loo xoojin lahaa xiriirka Wasaaradda ay la leedahay dhammaan Wadamada iyo hey’adaha Caalamiga ah.
