Wasiirka Qorsheynta iyo Horumarinta dhaqaalaha Soomaaliya Mudane Jamaal Maxamed Xasan ayaa warbaahinta Qaranka uga warbixiyay ahmiyadda shirarkii malmahan magaalada Washington ee dalka Mareynkanka uga socday wafdiga ra’iisal wasaaraha Soomaaliya iyo dalalka daneeya arrimaha Soomaaliya oo la soo gabagabeeyay.
Wasiir Jamaal ayaa sheegay in Shirkan oo mudo laga soo shaqeynayay ay soo qaban qaabiyeen Dowladda Ingiriiska,Midowga Yurub,Bankiga aduunka iyo Hay’adda lacagta aduunka ee (IMF),waxaana shirka ka soo qeyb galay dalalka deymaha ku leh Soomaaliya iyo ururada waa weyn.
“ Waxyaabaha looga hadlay waxaa ka mid ah,maadama lagu jiro gabagabadii ama qeybtii ugu dambeysay ee arrintii deyn cafiska Soomaaliya inaan fiirino dadka deynta nagu leh meeshey taagan yihiin,waqtiga maadama uu soo dhowaaday,xaaladooda waxay tahay, in Dowladda deynta laga cafinayo iyo in kale,” ayuu yiri Wasiirka Qorsheysan Soomaaliya.
Sidoo kale, Wasiirka Qorsheynta iyo Horumarinta dhaqaalaha Soomaaliya Mudane Jamaal Maxamed Xasan ayaa sheegay in qolo walba oo shirka ka hadashay ay diyaar ka tahay iney Soomaaliya kala hadlaan sidii lagu dhammeystiri lahaa deynta lagu leeyahay iyo cafinteeda.
Ra’iisal wasaaraha Soomaaliya Mudane Xasan Cali Kheyre ayaa shirarkii malmahan ka socday magaalada Washington ka sheegay in isbedelo la taaban karo laga gaaray dhinacyada horumarinta maamulka iyo maaliyadda,amniga iyo arrimo badan oo horumarinta dhaqaalaha dalka ku saabsan.
