Wasiirka Qorsheynta Xukuumadda Soomaaliya Jamaal Maxamed Xasan, Xoghayaha joogtada ah Mudane Cabdulqaadir Maxamed Aadan, Agaasinka kala duwan iyo khubarrada Wasaaradda Qorsheynta DFS ayaa maanta kulan la qaatay Agaasimaha Guud ee Madaxtooyada Qaranka,Agaasime ku xigeenka iyo la taliyeyaasha Madaxweynaha Jamhuuriyadda Federaalka Soomaaliya.
kulanka oo muhiimad gaar ah u lahaa labada dhinac ayay Wasaaradda Qorsheynta Qaranka ku soo bandhigtay warbaxin ku aaddan geeddi socodka qorista Qorshaha horumarinta Qaranka 9-aad, kobaca dhaqaalaha dalka, xogaha, dabagalka iyo Kormeerka mashaariicda iyo howlaha baaxadda leh ee Wasaaraddu waddo xiligan.
Agaasimaha Guud ee Madaxtooyada Qaranka Dr. Nuur Diiriye Xirsi (Fuursade) ayaa bogaadiyay heerka ay joogto wasaaradda qorsheynta iyo howlaha baaxadda leh oo ay waddo, wuxuuna bogaadiyay hoggaaminta Wasiirka, Xoghayaha joogtada ah ee wasaaradda iyo dhalinyarada aqoonyahannada ah.
Wasiirka Wasaaradda Qorsheynta Qaranka Amb. Jamaal Maxamed Xasan ayaa sharraxaad ka siiyay Agaasimaha Guud ee Madaxtooyada Qaranka iyo la taliyeyaasha madaxwaynaha maashriicda dalka ka socota, marxaladaha ay marayaan iyo howlaha adag ee wasaaraddu ka hayso dhinacaasi.
Xoghayaha Joogtada ah ee Wasaaradda Qorsheynta Mudane Cabdulqaadir Maxamed Aadan ayaa isagana sawir guud ka bixiyay wada-tashiga wareegga koowaad ee QHQ-9aad iyo sida ay u dhaceen dhammaan wada-tashiyadii ay wasaaraddu samaysay, waxuuna la wadaagay sadaxda ahmiyadood ee ka soo baxay wareegga koowaad ee kala ahaa Kobaca Dhaqaalaha, Siyaasada loo dhan-yahay iyo Amniga iyo sareynta Sharciga.
Masuuliyinta iyo Agaasimaha guud ee Madaxtooyada Qaranka oo si wanaagsan ula dhacay shaqada baaxadda leh ee dalka ka socota taasoo ay hormuud ka tahay Wasaaradda Qorsheynta isla markaana talooyin dhaxal gal ah la qeybsaday wasaaradda.
Gunaanadka kulanka ayaa la go’aamiyay in la sameeyo kulamo joogta ee labada dhinac si loo dar-dar galiyo shaqooyinka muhiimadda leh ee dalka ka socda kuwaasoo ay hormuud u tahay Wasaaradda Qorsheynta Qaranka.
W/Q: Cabdirashid Nuur Ibraahim
