Wasiirka Qorsheynta, Maalgashiga iyo Horumarinta Dhaqalaaha Xukuumadda Federaalka Soomaaliya, Mudane Maxamuud Cabdiraxmaan Sheekh Faarax (Beenebeene) oo uu wehliyo Lataliye Sare ee Xalka Waara ayaa maanta kulan wax ku ool ah kula qaatay xafiiskiisa wafdi ka socday Hay’adda UNHCR oo uu hogaaminyay Ergayga gaarka ah ee hay’adda UNHCR u qaabilsan arrimaha qaxootiga ee Bariga Afrika, Danjire Maxamed Cabdi Afeey oo uu wehliyo Wakiilka Hay’adda ee Soomaaliya, Mudane Magatte Guisse.
Labada dhinac ayaa ka wada hadlay sidii xal waara loogu heli lahaa dadka uu barakaca saameeyay iyo sida mashaariic hormarineed looga hirgelin lahaa deegaannada ay ka soo barakaceen si loogu fududeeyo in ay gaaraan nolol isku-filnaansho, una helaan adeegyada aasaasiga si waafaqsan Istaraatiijiyadda Qaran ee Xalka Waara.
Danjire Afeey ayaa ka mahadceliyay soo dhaweynta hogaanka Wasaaradda ay u fidiyeen asiga iyo wafdigiisa, waxa uuna balan qaaday in dhankooda ay sii adkeyn doonaan xariirka ay la leeyihiin dowladda Soomaaliya.
Ugu danbeyntii, Wasiir Beenebeene ayaa dhankiisa uga mahadceliyay Hay’adda UNHCR taageeradda ay mar walbo la garab taagantahay Shacabka Soomaaliyeed, gaar ahaan dadka barakaca saameeyay oo ay ka mid yihiin qaxootiga Soomaaliyeed ee ku kala baahsan adduunka dacaladiisa.
