Wasiirka shaqada iyo Arrimaha bulshada xukumadda Soomaaliya mudane Cabdiwali Sheekh Ibaraahim Muudey oo ka qeyb galayay barnaamijka kulanka Tododbaadka oo ka baxa Idaacadda iyo tvga Qaranka ayaa waxaa uu faah faahin ka bixiyay waxyaabihii u qabsoomay mudadii uu xilka hayay wasaaradda iyo Muhiimadda uu u lee yahay dalka sharciga shaqaalaha Ajaanibta ah oo dhawaan ay ansixyeen Baarlamanka Soomaaliya,
Wasiirka ayaa ugu horeyn ka hadlay waxyaabhii u qabsoomey sannadkaan Wasaarada Shaqada iyo Arrimaha bulshada iyo qorshayaasha kale ee xiga.
“Markaan xilka lawareegay aniga waxaan xoogga saaray oo aan billaabay baahida jirta anoo ka fiirinaya waxaan xoogga saaray sadax sharci in wasaaraddu ka shaqayso kuwaas oo kala ah sharciga hadda doodiisa aanu u fadhinno ee ah sharciga Shaqaalaha Ajaanibta ah oo la meelmariyay, Sharciga shaqaalaha gaarka loo leeyaya iyo sharciga Siyaasadda Naafada” Ayuu yiri wasiirka Shaqada Cabdiwali Muuday.
Wasiirka oo hadlayay Sharciga Shaqaalaha Ajaanibta ah ayaa sheegay in uu Shaqaalaha Ajaanibta ah sharcigaan siinayo fursado muhiim ah kuwaas oo sahlaya in ay howlaha shaqo ay Soomaaliya u yimadeen si fudud u qabsadaan.
Wasiirka shaqada iyo Arrimaha Bulshada mudane C\wali sheeq Ibraahim muuday oo hadalkiisa siiwata ayaa sheegay in sharciga Shaqaalaha Ajaanibta ah uu ahmiyad gaar ah siinayo shaqaalaha Soomaaliyeed isla markaana shaqaalaha Soomaaliyeed uu u fududaynayo in ay qabsadaan shaqo walba oo dalkooda taalla taas oo looga maarmo in qof Ajnabi ah qabto.
Wasiirka oo Su’aalo laga waydiiyay cidda sharcigaan wasaaradda ay la kaashatay ayaa sheegay in mas’uuliyiinta Wasaaradda Shaqada oo qura ay sharcigaan soo diyaariyeen kaddib markii ay arkeen in lama huran ay tahay in sharcigaan xadidaya shaqada shaqaalaha Ajaanibta ah la Diyariyo.
Sawir Qaade Farxaan Sulaymaan Daahir
