Wasiirka warfaafinta dhaqanka iyo dalxiiska ee xukuumadda Soomaaliya Mudane Maxamed Cabdi Xayir Maareeye oo safar shaqo ku tagay dalka Sacuudi Carabiya ayaa kulan muhiim ah la qaatay dhigiisa Boqortooyada Sacuudiga, iyagoo ka wada hadlay arrimo kale duwan oo la xiriira labada Wasaaradood.
Labada Wasiir ayaa ka wada hadlay sidii dowladda Sacuudiga ay kaalin uga qaadan laheyd horumarinta warbaahinta Soomaaliyeed, tayeynta iyo tababarada Suxufiyiinta Soomaaliyeed iyo dar dargelinta iskaashi dhexmara wasaaradaha warfaafinta Soomaaliya iyo Sacuudiga.
Mudane Maxamed Cabdi Xayir Maareeye Wasiirka warfaafinta dhaqanka iyo dalxiiska Xukuumadda Federaalka Soomaaliya oo dalka dib ugu soo laabtay maanta ayaa warbaahinta Qaranka sharaxaad ka siiyay kulankii uu dhigiisa boqortooyada Sacuudi Carabiya kula soo qaaday iyo ahmiyada uu u leeyahay Warbaahinta Soomaaliyeed.
Wasiir maareeye oo ka mid ahaa wafdigii uu hogaminayay madaxweynaha Jamhuuriyadda Soomaaliya ee kulanka la yeeshay boqorka dalka sacuudiga ayaa tilmaamay in dadka Sooomaaliyeed ee doonaya in ay ka shaqaystaan dalkaasi ay heli donaan sharuuc ay ku shaqeysan karaan. Dalalka Soomaaliya iyo sacuudiga ayaa waxaa ka dhexeeya xariir soo jiren ah, oo ku saleysan dhaqan iyo diin, iyadoo boqortooyada Sacuudiga ay Soomaaliya ka caawiso dhinac kale duwan
