Wasiirka Warfaafinta, Dhaqanka iyo Dalxiiska ee Xukuumadda Soomaaliya Mudane Maxamed Cabdi Xayir Maareeye oo ay wehliyaan Agaasimaha Telefishinka Qaranka iyo xiriirka Warbaahinta madaxa banaan Mudane Cabdiraxmaan Yuusuf Sheekh Al-cadaala iyo mas’uuliyiin kale ayaa maanta kulan la qaatay safiirka Britain ee Soomaaliya Harriet Mathews, kaasi oo ay kaga wada hadleen xoojinta xiriirka labada dal iyo sidii Dowlada Ingiriiska uga qeyb qaadan laheyn Horumarinta Warbaahinta Soomaaliya.
Safiirka Dowladda Ingiriiska u fadhiya Soomaaliya Danjire Harriet Mathews ayaa ugu horeyn ka hadashay kulanka ay maanta la qaadatay Wasiirka Warfaafinta iyo mas’uuliyiin la socotay iyo waxyaabaha ay ka wada hadleen.
“Waxaan kulan aad u wanaagsan la qaatay xubno uu hogaaminayo Wasiirka Warfaafinta Soomaaliya, waxaana ka wada hadalnay xiriirka saaxiibtinimo ee ka dhaxeeya UK iyo Soomaaliya, sidoo kale xiriirka soo jireenka ah ee dhaxeeya labada dowladood iyo labada shacab, waxaan kaloo ka wada hadalnay horumarinta Warbaahinta Soomaalida, arrimaha xuriyatul qowlka iyo sidoo kale horumarinta dhaqanka Soomaaliya” ayay tiri Danjire Harriet Mathews.
Wasiirka Warfaafinta Dhaqanka iyo Dalxiiska Soomaaliya Mudane Maxamed Cabdi Xayir Maareeye ayaa sheegay in safiirka Britian ee Soomaaliya ay isku afgarteen sidii dowlada Ingiriiska ay usii xoojin laheyd taageerada ay Soomaaliya siiso iyo sidoo kale Horumarinta Warbaahinta Dalka.
“Maanta waxaan halkaan kula kulanay ambaasadoorka Ingiriiska Soomaaliya u fadhisa, waxaana kala hadalnay xiriirka wanaagsan ee kala dhaxeeya dowladaha Soomaaliya iyo Ingiriiska iyo taageerada had iyo jeer dowlada Britain ay la garab taagantahay dowladda Soomaaliyeed, waxaan isla soo hadal qaadnay in taageerada dowladda Ingiriiska ay siineyso Soomaaliya in la sii xoojiyo, kuwaasoo isugu jira dhinaca ammaanka, horumarinta dowladnimada iyo dhisida hay’adaha dowladda iyo sidii dowlada Ingiriiska ay Soomaaliya uga taageerto horumarinta Warbaahinta” ayuu yiri Wasiir Maareeye.
