Wasiirka Warfaafinta, Dhaqanka iyo Dalxiiska ee Xukuumadda Federaalka Soomaaliya Mudane Cisman Abuukar Dubbe oo maanta xafiiskiisa ku qaabilay Safiirka dowladda Talyaaniga ee Soomaaliya Danjire Alberto Vecchi, ayaa kala saxiixday heshiis lagu horumarinayo Radio Muqdisho, isla markaana horaanta sanadka cusub ee soocda Raadiyaha laga bilaabi doono baahinta Afka Talyaaniga oo ahaa luuqadihii ka bixi jirtay Idaacadda.
Munaasabadda heshiiska ay ku kala saxiixanayeen Wasiirka Warfaafinta iyo Safiirka Talyaaniga ee Soomaaliya oo ka dhacay Xafiiska Wasiirka ayaa waxaa ka qeyb galay qaar ka mid ah Agaasime Waaxeedyada Wasaaradda Warfaafinta iyo xubno kale.
Agaasimaha Guud ee Wasaaradda Warfaafinta Soomaaliya Mudane Cabdullaahi Xayir Ducaale ayaa sheegay in heshiiska uu yahay sidii Raadiyaha Qaranka dib markale looga baahin lahaa luuqadda Afka Talyaaniga, isagoo intaa ku daray inay dib u dhis ku sameyn doonaan Istuudiyaasha Raadiyaha iyo Keydka Hadalka ee Qaranka oo habcasri ah loo rogi doono cajaladaha ku keydsan.
“Waxaa maanta halkan lagu kala saxiixday Wasaaradda Warfaafinta dhaqanka iyo Safiirka Talyaaniga ee Soomaaliya, heshiis ku saabsan sidii Afka Talyaaniga looga bilaabi lahaa Radio Muqdisho sanadka cusub ee 2022, gaar ahaan bisha Janaayo, Xiriirka Radio Muqdisho iyo Talyaaniga waxa uu soo bilowday sanadkii 1951-dii, sidoo kale waxa ay tababaro siin doonaan shaqaalaha Wasaaradda, gaar ahan Waaxda Radio Muqdisho, heshiiskana waxaa kala saxiixday Wasiirka Warfaafinta Mudane Cismaan Dubbe iyo Safiirka Talyaaniga ee Soomaaliya Danjire Alberto Vecchi,”. Ayuu yiri Agaasimaha Guud ee Wasaaradda Warfaafinta.
https://youtu.be/MSCsB2LOYJ0
