Magaalada Muqdisho ee Caasimadda Soomaaliya waxaa lagu qabtay Sanadguuradii 100-aad ee xurnimada dalka Finland, waxaana ka qeyb galay mas’uuliyiin uu ka mid yahay Wasiirka Warfaafinta, Dhaqanka iyo Dalxiiska ee Xukuumadda Soomaaliya Mudane Cabdiraxmaan Cumar Cismaan Eng Yariisow.
Wasiirka Warfaafinta ayaa Safiirka Finland ee Soomaaliya Danjire Tarja Fernandez kaga mahad celiyay in Muqdisho lagu xuso sanad guuradii 100-aad ee xurnimada Finland, taas uu sheegay inay cadeyn u tahay sida Dowlada Finland ay u dooneyso in lasii xoojiyo xiriirka taariikhiga ee u dhaxeeya Finland iyo Soomaaliya oo soo bilowday 1971-dii sida wasiirka sheegay.
Related posts
Eng, Cabdiraxmaan Cumar Cismaan Eng Yariisow ayaa sidoo kale uga mahad celiyay Safiirka sida Dowlada Finland ay u soo dhaweysay qaxootiga Soomaaliyeed ee dalkaasi tegay, sida ay uga mid noqdeen bulshada ku nool dalkaasi iyo sida ay ugu dhiiri geliyaan in dalkooda ay kusoo laabtaan oo ay ka qeyb qaateen dib u dhiskiisa.
Wasiirka ayaa ugu dambeyn sheegay in Dowlada Finland ay wada shaqeyn wanaagsan la leedahay Wasaaradda Warfaafinta, iyagoo fuliyay Mashruuc lagu qalabeeyay Telefishinka Qaranka Soomaaliya SNTV, isla markaana tababaro siiyay saxafiyiinta Soomaaliyeed, iyagoo u soo diray Soomaaliya khubaro dhanka Warbaahinta ah.
Safiirka dowladad Finland ee Soomaaliya Danjire Tarja Fernandez ayaa balanqaaday in Mashruucyo badan oo horumarineed ay Soomaaliya ka fulin doonaan sanadaha soo socda.
