RADIO MUQDISHO:-Wasiirka Wasaaradda Warfaafinta, Dhaqanka iyo Dalxiiska Xukuumadda Federaalka Soomaaliya Mudane Cabdifitaax Qaasim Maxamuud ayaa maanta xafiiskiisa kulan kula qaatay Wakiilka Hay’adda Horumarinta Qaramada Midoobay ee Soomaaliya (UNDP) mudane Christophoros Politis.
Wakiilka UNDP markii uu soo gaaray xarunta Wasaaradda waxaa soo dhaweeyay Agaasimaha Guud ee Wasaaradda Mudane Cabdullaahi Xayir Ducaale, waxa uu booqday xarumaha Warbaahinta Qaranka iyo Kaydka taariikhiga ah ee Radio Muqdisho, halkaas oo uu ku soo indha-indheeyay shaqada ka socota xarumahaasi iyo dadaallada lagu ilaalinayo dhaxalka taariikhiga ah ee warbaahinta Soomaaliya.
Kulanka wasiirka iyo mudane Christophoros Politis ayaa diiradda lagu saaray xoojinta xiriirka wada-shaqeyneed ee Wasaaradda iyo UNDP iyo sidii loo abuuri lahaa iskaashi joogto ah oo taageeraya mudnaanta Wasaaradda ee dhinacyada warbaahinta, xiriirka istiraatiijiga ah, wacyigelinta dadweynaha, dhaqanka iyo dalxiiska.
Labada dhinac ayaa si gaar ah uga wada hadlay iskaashi ku saabsan horumarinta awoodda warbaahinta, wacyigelinta iyo jiheynta dadweynaha, taageerada warbaahinta iyo wacyigelinta doorashooyinka, ka-hortagga wararka been-abuurka iyo marin-habaabinta, la-dagaallanka xagjirnimada rabshadaha wata (PCVE), iyo horumarinta iyo dhiirrigelinta dhaqanka iyo dalxiiska Soomaaliya.
Wasiirka ayaa xusay muhiimadda ay leedahay in wada-hadallada labada dhinac loo beddelo iskaashi farsamo oo la taaban karo, iyadoo la dejinayo mudnaanta, qorshaha fulinta iyo hab joogto ah oo isku-duwidda Wasaaradda iyo UNDP.
Labada dhinac ayaa isku afgartay in la sii ambaqaado wada-hadallada farsamo, si fursadaha iskaashi ee la isla gartay loogu beddelo barnaamijyo iyo hawlo wax ku ool ah.
Kulanka waxaa dhinaca Wasaaradda ka qeyb galay Agaasimaha Guud Cabdullaahi Xayir Ducaale, Agaasimaha Waaxda Istiraatiijiyadda Xiriirka Warbaahinta Cabdishakuur Cali Axmed iyo Agaasimaha Wakaaladda Wararka Qaranka Soomaaliyeed ee SONNA Ismaaciil Mukhtaar Cumar. Dhinaca UNDP waxaa ka qeyb galay mas’uuliyiinta qeybaha Xiriirka Dowladda, Siyaasadda iyo Warbaahinta.
