Wasiirka Warfaafinta, Dhaqanka iyo Dalxiiska ee Xukuumada Federaalka Soomaaliya, mudane Cismaan Abokor Dubbe ayaa Ummadda Soomaaliyeed ugu tacsiyeeyay geerida fanaankii Qaranka Allaha u naxariistee, Faarax Siidow Faarax oo ku geeriyooday magaalada Muqdisho.
Wasiirka Cismaan Dubbe, oo la hadlay Radio Muqdisho ayaa sheegay in fanaanku uu ka mid ahaa hal abuurada ugu waa weynaa oo Qaranka u soo hurey wax kasta, isla markaana dhaxal lama ilaabaan ah uga tagay dadka Soomaaliyeed, isagoo si gaar ah tacsi ugu diray ehelada iyo asaxaabtii uu ka baxay Marxuum Faarax Siidow Faarax.
Allaha u naxariistee geerida Marxuum Faarax Siidow Faarax waxaa Warbaahinta Qaranka u xaqiijiyay wiilkiisa oo lagu magacaabo Maxamuud Faarax Siidow.
Marxuumka waxa uu ifka kaga tegay hal xaas iyo 13 carruur ah, waxaana magaciisa saxda ah la oran jiray Faarax Cali Faarax, balse waxa uu caan ku ahaa magaca Faarax Siidow Faarax.
Allaha u naxariistee Marxuum Faarax mar uu wareysi siiyay Telefishinka Qaranka 6-dii April sanadkii 2018-ka waxa uu sheegay in uu Qur’aanka dhameeyay isagoo sideed jir ah, isla markaana uu Abtigiisa u soo raacay Muqdisho,
Sanadkii 1993-kii ayuu ku soo biiray fanka, isagoo hees u qabtay sanadkii 1965 keydka hadlaka ee Radio Muqdisho.
Marxuumka ayaa yaraantiisa waxa uu tirin jiray gabayo, isagoo suugaan u qaadi jiray Xisbigii Leegada, isla markaana waxa uu ka mid ahaa aas aasayaasha cayaaraha Hidaha iyo dhaqanka.
Madaxda Wasaaradda Warfaafinta ayaa fanaaninta Hobolada Qaranka ee Waaberi iyo guud ahaan Ummadda Soomaaliyeed uga tacsiyadeeyay geerida Fanaankii caanka ahaa Marxuum Faarax Siidow Faarax.
