Wasiirka Warfaafinta iyo Hanuuninta Dadweynaha ee Xukuumadda Soomaaliya Eng, Cabdiraxmaan Cumar Cismaan Yariisow iyo wafdi uu hogaaminayo oo socdaal shaqo ku tegay magaalada Kampala ee xarunta Dalka Uganda ayaa halkaasi kula kulmay Wasiirka Warfaafinta, Isgaariinta iyo Teknoloojiyada ee Uganda Frank Tumwebaze.
Labada Wasiir ayaa ka wada hadlay xoojinta xiriirka labada dal iyo sidii ay isaga kaashan lahaayeen xagga tabbarsiinta shaqaalaha dowladda, isla markaana ay isdhaafsadaan macluumaadka xagga wararka.
Wasiirka Warfaafinta, Isgaariinta iyo Teknoloojiyada ee Uganda Frank Tumwebaze ayaa sheegay in uu aad ugu faraxsanyahay kulanka uu la qaatay dhigiisa Soomaaliya, isagoo xusay in labada dal Soomaaliya iyo Uganda ay ka dhexeyso xiriir soo jireen ah.
Wasiirka Warfaafinta iyo Hanuuninta Dadweynaha ee Xukuumadda Soomaaliya Eng, Cabdiraxmaan Cumar Cismaan Yariisow ayaa sheegay in kulanka uu la qaatay dhigiisa Uganda Mr Frank Tumwebaze ay kaga wada hadleen arrimo ay ka midtahay xoojinta xiriirka labada Wasaaradood iyo sidii ay Wasaaradda Warfaafinta Soomaaliya uga caawin lahaayeen xagga tababbarada.
“Waxaan maanta dalka Uganda kula kulmay Wasiirka Warfaafinta, teknoloojiyada , waxaana isla garanay in la xoojiyo xiriirka labada dhinac, in ay tabbaro siiyaan shaqaalaha, waxaana isku afgaranay inaan kala saxiixano heshiisyo dhowr qodob ka kooban oo ay kamidtahay inay naga caawiyaan dhanka aqoonta iyo Telefishinada Soomaalida laga dhigo kuwa muuqaalkoda tayo leh oo meelkasta oo gudaha dalkana laga daawan karo” ayuu yiri Wasiirka Warfaafinta Soomaaliya,
Β 
Β 
